" න, ප, බ "

• නිවට ඇම්බැට්ටයා දුටුවාම එළුවත් රැවුල පෑවා වගෙයි./නිවටයාට එළුවත් රැවුළ පානවලු.
  අහිංසකයන්ට සෑම කෙනෙකුගෙන්ම කරදර සිදුවන බව.

• නරියා මිදි ඇඹුල් කීවා වගෙයි.
  ලබාගත නොහැකි දෙයකට ගැරහීම.
  
  
• නම කපුරුහාමි වුණාට කටේ ගඳ හත් ගව්වකට දැනෙනවාලු.
  නමින් නොව ක්‍රියාවෙන් මිනිසකු පිළිබඳව තීරණය කළ යුතු බව.
  
  
• නයා ගුරුලගෙන් සැප සනීප ඇහැව්වලු.
  ප්‍රබලයන් සමඟ සිටින දුර්වල පුද්ගලයන් ප්‍රබලයන් ඇසුරෙන් ඔද වැඩී ඒ බලය පෙන්වීම.
  
  
• නයාට අඳු කොළ වගේ.
  දැකීමට කිසිම කැමැත්තක් නොතිබීම.
  
  
• නාහෙට උඩින් අඟලක් ගියත් එකයි, අඩියක් ගියත් එකයි.
  සීමාව ඉක්මවා කරදර තියෙද්දී තව කරදර එක්වුණාට වෙනසක් දැනෙන්නේ නැහැ.
  
  
• නිදන් ඉන්න කොටි අවුස්සනවා.
  නැති කරදර සොයා යනවා.

• පරංගියා කෝට්ටේ ගියා වගෙයි.
  යමක් කිරීමට පහසු මඟක් තිබියදී එය අපහසුවෙන් කිරීම.
  
  
• පිස්සිගෙ පලා මල්ල වගෙයි.
  යමක් ඉතා අවුල් සහගත ලෙස තිබීම.
  
  
• පනින රිළවුන්ට ඉනිමං තැබුවා වගෙයි.
  වැරදි කරන අයට වැරදි කිරීමට පහසුවන අන්දමින් කටයුතු කිරීම.
  
  
• පුස්ස බින්දා වගෙයි.
  කරන ලද දෙයින් කිසිම ප්‍රයෝජනයක් නොලැබීම.
  
  
• පිදුරු ගොඩේ ඉන්න බල්ලා වගෙයි.
  යමකින් තමන් ප්‍රයෝජනයක් නොගෙන අනුන්ටත් ප්‍රයෝජනයක් ගැනීමට ඉඩ නොදීම.
  
  
• පල නොකියා පලා බෙදුවා වගෙයි.
  අප්‍රසාදය කටින් නොකියා ක්‍රියාවෙන් පෙන්වීම.
  
  
• පියා දරුවන්ට කෝටු මිටිය කඩන්න දුන්නා වගෙයි.
  සමගිව සිටිනතාක් විපතක් කිරීමට නොහැකි බව.
  
  
• පැණි වරකා ගහටත් හෙණ වදිනවලු.
  බලසම්පන්න අයට වුවත් දුෂ්කරතාවලට මුහුණ දීමට සිදුවන බව.
  
  
  
  
  
  
• බල්ලන්ට ලෙලි පොල් දුන්නා වගෙයි.
  යමකින් ප්‍රයෝජනයක් ගත නොහැකි කෙනෙකුට එය තෑගි දීම.
  
  
• බීරාගෙන් පාර ඇහුවා වගෙයි.
  විසඳුමක් ලබාදිය නොහැකි අයකු වෙත ප්‍රශ්නයක් ඉදිරිපත් කිරීම.
  
  
• බල්ලාගේ වැඩේ බූරුවා බාරගත්තා වගෙයි.
  තමාට අයිති නැති රාජකාරියක් කිරීමට ගොස් අමාරුවේ වැටීම.
  
  
• බල්ලා පිදුරු කන්නෙත් නෑ, කන ගොනාට දෙන්නෙත් නෑ.
  තමන් ප්‍රයෝජනයට ගන්නෙත් නැහැ. අනුන්ට ප්‍රයෝජන ගන්න දෙන්නෙත් නැහැ.
  
  
• බණ බැරි වුණාට ගම තොටගමුවලු.
  යමක් කරන්නට හැකියාව නොතිබුණාට, බොරු පුරාජේරුව පෙන්වීම.
  
  
• බල්ලට කිව්වහම බලු නකුටට (වලිගෙට) කියනවා වගේ.
  කෙනෙකුට යම් කාර්යයක් පැවරූ විට, එය අන් අයට පැවරීම.
  
  
• බත් ඇති තැනටමලු කොස්.
  බොහෝ දෑ  ඇති තැනටම වාසි සැලසීම.
  
  
• බළලුන් ලවා කොස් ඇට බාවනවා වගේ.
  තම වාසිය සලසා ගැනීම සඳහා තවත් අයකු අවදානමකට පත් කිරීම. 
  
  
• බැඳලා ගැහැව්වත් එකයි, ගහල බැන්දත් එකයි.
  කුමන ආකාරයට කළත් ප්‍රතිඵලය එකක්විම.
  
  
• බීරි අලියාට වීනා වාදනය කරනවා වගේ.
  අවවාද, අනුශාසනා කිරීමෙන් ප්‍රයෝජනයක් නොවන බව.
  
  
• බුරන බල්ලා හපා නොකයි.
  ශබ්දය තරමට ක්‍රියාව සිදු නොවීම.
  
  
• බැද්දට පායපු හඳ වගෙයි.
  වටින දෙයකින් කිසිවකුට ප්‍රයෝජනයක් ගැනීමට නොහැකි වීම.