• අනුන්ට කැපූ වළේ තමන්ම වැටීම.
  අනෙකෙකු විපතට පත් කිරීම සඳහා තමන් අටවන ලද උගුලකට තමන්ම හසුවී කරදරයට පත්වීම.
  
  
• අපි කන හැටි ලිපා දනී.
  තමන් අගහිඟකම්වලින් පෙළෙන බව දැක්වීම.
  
  
• අවි ගත්තෝ අවියෙන්ම නසිති.
  දරුණු ක්‍රියාවල යෙදුණු අය එයින්ම වැනසෙන බව.
  
  
• ආරේ ගුණ නෑරේ.
  ජන්මයෙන් එන පුරුද්ද අත් නොහැරිය හැකි බව.
  
  
• ඇම ගිල්ල මාළුවා වගෙයි.
  ගැලවිය නොහැකි ලෙස ප්‍රශ්නයකට කොටු වී සිටීම.
  
  
• ඇවිළෙන ගින්නට පිදුරු දැමීම.
  ආරවුල් හෝ අවුලක් ඇති තැනකට තවත් ආරවුල් ඇති කිරීමට කටයුතු කිරීම.
  
  
• අටුව කඩා පුටුව හැදුවා වගේ.
  වටිනා දෙයක් විනාශ කර නොවටිනා දෙයක් කිරීම.

• කුඩු කෑ විත්තිය වගෙයි.
  නින්දා කටයුතු ක්‍රියාවක් හෙළිවීමට බියවීම.
  
  
• කළ හොඳ පස්සෙන් එනවා වගෙයි.
  උදවු කළ අයගෙන් විපත් සිදුවීම.
  
  
• නරියා මිදි ඇඹුල් කීවා වගෙයි.
  ලබාගත නොහැකි දෙයකට ගැරහීම.
  
  
• පල නොකියා පලා බෙදුවා වගෙයි.
  අප්‍රසාදය කටින් නොකියා ක්‍රියාවෙන් පෙන්වීම.
  
  
• ගෝනි නැතුව කරේ යන්න හදනවා වගෙයි.
  දෙන ලද සහනයෙන් අයුතු ප්‍රයෝජන ගැනීමට උත්සහ කිරීම.
  
  
• උණකාරයා වතුර ඉල්ලනවා වගෙයි.
  යමෙක් නිතර නිතර කරදර කිරීම.
  
  
• ආඳා මාළු ඉරටුවෙන් කනවා වගෙයි.
  අකැමැත්තෙන් මෙන් තම කාරිය ඉටුකරගැනීම.
  
  
• කකුළුවා තම පැටවුන්ට කෙළින් යන්න ඉගැන්නුවා වගෙයි.
  තමා වැරදි කරමින් එසේ නොකරන ලෙස අවවාද කිරීම.
  
  
• අන්ධයා කිරිවල පාට කිවුවා වගෙයි.
  වැරදි ලෙස තේරුම් ගත් දෙයක් නිවැරදි යයි සිත ප්‍රකාශ කිරීම.
  
  
• පිය දරුවන්ට කෝටු මිටිය කඩන්න දුන්නා වගෙයි.
  සමගිව සිටිනතාක් විපතක් කිරීමට නොහැකි බව.

• කුරුල්ලා මිටෙන් ඇරියා වගෙයි.
  තම අභිමතය පරිදි නිදහසේ කටයුතු කිරීමට ඉඩ ලැබීම.
  
  
• අන්දරේ පොල් පැළ රැක්කා වගෙයි.
  මෝඩයකුට වැඩක් පැවරීමෙන් අලාභ සිදුවේ.
  
  
• කිතුල් ගහට ගිය මිනිහා වගෙයි.
  කපටියාට ඕනෑම වරදක් කර නිදහසට කීමට කරුණු ඇත.
  
  
• කුඤ්ඤය ගැළවූ වඳුරා වගෙයි.
  අනවශ්‍ය දේ කිරීමට ගොස් කරදරේ වැටීම.
  
  
• කොටි වලිගය අල්ලා ගත්තා වගෙයි.
  පටන් ගත් දෙය ඉවර කර ගැනීමටත් අත් හැරීමටත් නොහැකි වීම.
  
  
• අඳු කොළ කැවිලා වගේ.
  නොගැළපෙන විකාර වැඩ කිරීම.
  
  
• කොටියාට හරක් පට්ටිය බාර දුන්නා වගෙයි.
  හොරෙකුට යමක් ආරක්ෂා කිරීමට භාරදීම.
  
  
• ගමරාලගේ වංගෙඩිය වගෙයි.
  විවිධ වැඩ කිහිපයක් සඳහා එකම දෙය (උපකරණය) යොදා ගැනීම.
  
  
• හිඟන්නාගේ පාත්තරේ හෙනහුරා වැහුවා වගෙයි.
  දුකට පත් අය තවත් දුකට පත්වීම.
  
  
• වැටක් නැති වත්තට හරක් එනවා වගෙයි.
  ආරක්ෂාව නොමැති කල පාඩු සිදුවේ.
  
  
• ආතාට අටුකොස් දුන්නා වගෙයි.
  යමෙකුට ප්‍රයෝජනයක් ගත නොහැකි දෙයක් දීම. 

• ගෙම්බා බඩ පිම්බුවා වගෙයි.
  පුහු ආඩම්බරය නිසා විනාශයට පත්වීම.
  
  
• ඇමක් දී මාළුවකු අල්ලා ගන්නවා වගෙයි.
  සුළු දෙයක් දී ලොකු අය රවටා ගැනීම.
  
  
• කම්මලේ ඉන්න බල්ලා වගෙයි.
  යමකට පුරුදු වූ විට එහි අපහසුතාවක් නොදැනීම.
  
  
• මඟුල් ගෙදර ගිහින් කැවුම් නොකා ආවා වගෙයි.
  අවශ්‍යයෙන්ම ලැබිය යුතු දෙයක් නොලැබීම.
  
  
• ඔරුව පෙරළෙද්දී තම්බි දුම් කුඩු ඉරුවා වගෙයි.
  විපතේදී වුවද පුරුද්ද අත්හැරිය නොහැක.
  
  
• වඩුවගේ ගෙදර පුටුවක් නැතුවා වගෙයි.
  තමන්ට කරගත හැකි දේ තමා කර නොගෙන අනුන්ට කර දීම.

• ගිරයට හසුවූ පුවක් ගෙඩිය වගෙයි.
  දෙපැත්තකින් තැළෙන ගැළවෙන්නට අපහසු කරදරයකට පත්වීම.
  
  
• උරුලෑව ගිය පාර වගෙයි.
  ගිය ගිය තැන අප්‍රසන්න හැසිරීම් රටාවලින් යුක්තවීම.
  
  
• කණ කැස්බෑවා විය සිදුරෙන් අහස බලනවා වගෙයි.
  ඉතාමත් කලාතුරකින් සිදුවිය හැකි දෙයක් වීම.
  
  
• කන්ද පහුවුණාම හැරමිටිය විසිකරනවා වගෙයි.
  තමන්ගේ කාර්යය කරගත් පසු ඒ සඳහා උපකාර කළ අය නොසලකා හැරීම.
  
  
• කපන්න බැරි අත සිඹිනවා වගෙයි. / කපන්ට බැරි අත ඉඹිනවලු.
  විරුද්ධවාදියගෙන් පළිගැනීමට නොහැකි විට ඔහු පිළිබඳව මිත්‍ර ලීලාවෙන් කතා කිරීම.
  
  
• ඔරුව පෙරළෙද්දී තම්බි දුම් කුඩු ඉරුවා වගෙයි.
  විපතේදී වුවද පුරුද්ද අත්හැරිය නොහැක. 

• කොකා දිය හිඳෙන තුරු බලා සිටියා වගෙයි.
  යම් දෙයක් ලබා ගැනීමට දිගු කලක් බලා සිටීමට සිදුවීම.
  
  
• ගඟෙන් වතුර බී මුහුදට ආ වඩනවා වගෙයි.
  උපකාර ලබා ගත් තැනැත්තා සිහිපත් නොකොට අන් අයව පැසසීම.
  
  
• ගලේ කෙටූ අකුරු වගෙයි.
  මොනයම් හේතුවක් නිසා හෝ කි දෙය වෙනස් නොකිරීම.
  
  
• කුරුල්ලන්ට වැට බැන්දා වගෙයි.
  අසාර්ථක කාර්යයක නිරතවීම.
  
  
• කිඹුලා කිරි මැටි ගිලිනවා වගෙයි.
  රසයක් ගුණයක් ගැන නොසිතා ආහාර විශාල ප්‍රමාණයක් ගිල දැමීම.
  
  
• තම්බිගෙ තොප්පිය වගෙයි.
  ස්ථීර ප්‍රතිපත්තියක නොපිහිටා ක්‍රියා කිරීම.
  
  
• තැඹිලි ගෙඩියෙ වහපු කපුටා වගෙයි.
  දෙදෙනෙකු අතර බලවත් නොගැලපීමක් තිබීම.

• වඩා ගත්තාට බෙල්ල මිරිකුවා වගෙයි.
  උපකාරයක් කළ තැනැත්තාට අපකාරයක් /කරදරයක් කිරීම.
  
  
• බල්ලන්ට ලෙලි පොල් දුන්නා වගෙයි.
  යමකින් ප්‍රයෝජනයක් ගත නොහැකි කෙනෙකුට එය තෑගි දීම.
  
  
• වැටෙන්න යනකොට කටු අත්තක් අල්ලා ගත්තා වගෙයි.
  එක කරදරයකින් මිදෙන්නට උත්සාහ කරන විට තවත් කරදරයකට පත්වීම.
  
  
• රජ ගෙදර පරෙවියා වගෙයි.
  සැප සම්පත් වලින් අඩුවක් නොමැතිව සතුටින් සිටීම.
  
  
• මිටි කිරි ඉවතලා දියකිරි ගත්තා වගෙයි.
  යහපත් දේ ඉවතලා අයහපත් දේ පිළිගැනීම./ අවශ්‍ය දෙය නොගෙන අනවශ්‍ය දේ ගැනීම.
  
  
• බීරාගෙන් පාර ඇහුවා වගෙයි.
  විසඳුමක් ලබාදිය නොහැකි අයකු වෙත ප්‍රශ්නයක් ඉදිරිපත් කිරීම.
  
  
• බල්ලාගේ වැඩේ බූරුවා බාරගත්තා වගෙයි.
  තමාට අයිති නැති රාජකාරියක් කිරීමට ගොස් අමාරුවේ වැටීම.
  
  
• පුස්ස බින්දා වගෙයි.
  කරන ලද දෙයින් කිසිම ප්‍රයෝජනයක් නොලැබීම.
  
  
• පිදුරු ගොඩේ ඉන්න බල්ලා වගෙයි.
  යමකින් තමන් ප්‍රයෝජනයක් නොගෙන අනුන්ටත් ප්‍රයෝජනයක් ගැනීමට ඉඩ නොදීම.
  
  
• දෙබරෙට ගල් ගැහුවා වගෙයි.
  තමන් විසින්ම නොතිබූ කරදර ඇතිකර ගැනීම.

• කුඩම්මා ඇවිත් කැවුම් පුංචි කළා වගෙයි. / පුංචි අම්මා ඇවිත් කැවුම් පුංචි කළා වගෙයි.
  විශාල බලාපොරොත්තුවක් තැබූ කෙනෙකුගෙන් ඒ බලාපොරොත්තුව ඉටු නොවීම. 
  ප්‍රසන්න පුද්ගලයකුගෙන් අප්‍රසන්න ක්‍රියාවක් සිදුවීම.
  
  
• පැණි වරකා ගහටත් හෙණ වදිනවලු.
  බලසම්පන්න අයට වුවත් දුෂ්කරතාවලට මුහුණ දීමට සිදුවන බව.
  
  
• ගඟට ඉනි කැපුවා වගෙයි.
  මහන්සිවී කරන වැඩ වලින් අවසානයේ කිසිම ප්‍රයෝජනයක් නොලැබීම හෝ ප්‍රයෝජනයක් ලැබිය නොහැකි ලෙස මෝඩ ක්‍රියාවක් කිරීම.
  
  
• කුස රජ්ජුරුවොත් මසුන් කද ඇද්දලු.
  උතුමන්ට පවා පහත් වැඩ කිරීමට සිදුවේ.
  
  
• හිල් කූඩෙන් වතුර අදිනවා වගෙයි.
  ප්‍රයෝජනයක් නොමැති දෙයකට මහන්සිවීම.
  
  
• ලෙඩ කපුටා වැල ගිලිනවා වගෙයි.
  කිසිවෙක් තමාට පැවරුණු කාර්යය ඕනෑවට එපාවට කිරීම.
  
  
• වක්කඩ කැඩුවා වගේ.
  පාලනයකින් තොරව වාචාල ලෙස කතා කිරීම.

•  කිරි කළයට ගොම මුසු කළා වගෙයි.
  යහපත් වැඩ රාශියක් කර අවසානයේ අයහපත් වැඩක් කිරීම.
  
  
• ගුරුන්ටත් අකුරු වරදිනවා වගෙයි.
  යමක් හොඳින් දන්නා අය අතිනුත් වැරදි සිදුවන බව.
  
  
• මිටි තැනින් වතුර බහිනවා වගෙයි.
  කිසියම් වරදක් සිදුවූ විට එය අහිංසකයන්  පැවරීම.
  
  
• වඳින්න ගිය දේවාලය හිසේ කඩන් වැටුණා වගෙයි.
  යහපත් වැඩක් / උදව්වක් කරන්නට ගොස් එයින් තමන්ට නැති කරදර සිදුවීම. 
  
  
• එළිපත්ත උඩ සිටින බළලා වගෙයි.
  ස්ථිර තීරණයක් නොගෙන් සිටීම.
  
  
• ලැජ්ජා නැතිකම මහ මුදලිකමටත් වඩා ලොකුයි කිවුවා වගෙයි.
  යම් අයකු තමාගේ තරාතිරමට නොගැළපෙන ඉතා පහත් වැඩ කිරීම.
  
  
• නිවට ඇම්බැට්ටයා දුටුවාම එළුවත් රැවුල පෑවා වගෙයි./නිවටයාට එළුවත් රැවුළ පානවලු.
  අහිංසකයන්ට සෑම කෙනෙකුගෙන්ම කරදර සිදුවන බව.

• හොරාගෙ අම්මගෙන් පේන ඇහුවා වගෙයි.
  වැරදි වසන් කරන අයගෙන්ම වැරැද්දක් ගැන ඇසීම.
  
  
• වක්කඩේ හකුරු හැංගුවා වගෙයි.
  නිෂ්ඵල වැඩක යෙදීම. / විනාශවන තැනක යමක් ආරක්ෂාවට තැබීම.
  
  
• කටුස්සගේ කරේ රත්තරන් බැන්දා වගෙයි.
  යම් වස්තුවක්/ යම් තනතුරක් ලැබීමෙන් ඉතා ආඩම්බර වීම.
  
  
• යුද්දෙට නැති කඩුව කොස් කොටන්නද?
  අවශ්‍ය විටෙක ප්‍රයෝජනයට ගැනීමට නැති දේ, අනවශ්‍ය විටෙකද ප්‍රයෝජනයක් නැති බව.
  
  
• ගොනයි මීමයි වගේ.
  යම්කිසි දේවල් දෙකක් හෝ දෙදෙනෙක් කිසිසේත්ම නොගැළපෙන බව.
  
  
• රයිගමයයි ගම්පලයයි වගේ.
  එක වගේ කපටියන් දෙදෙනෙකු බව.
  
  
• බැද්දට පායපු හඳ වගෙයි.
  වටින දෙයකින් කිසිවකුට ප්‍රයෝජනයක් ගැනීමට නොහැකි වීම.

• කළුවා මාරපන් ගියා වගෙයි.
  කළ යුතු දේ වටහා නොගෙන ක්‍රියා කිරීම / නොදැන ක්‍රියා කිරීම.
  
  
• ජාඩියට මූඩිය වගෙයි.
  හරියටම ගැළපෙන බව / හොඳින්ම ගැළපෙන බව.
  
  
• ගහෙන් වැටුණු මිනිහට ගොනා ඇන්නා වගෙයි.
  කරදරයක් වූ අයෙකුට ඒ පිටම තවත් කරදරයක් සිදුවීම.
  
  
• පරංගියා කෝට්ටේ ගියා වගෙයි.
  යමක් කිරීමට පහසු මඟක් තිබියදී එය අපහසුවෙන් කිරීම.
  
  
• පිස්සිගෙ පලා මල්ල වගෙයි.
  යමක් ඉතා අවුල් සහගත ලෙස තිබීම.
  
  
• පනින රිළවුන්ට ඉනිමං තැබුවා වගෙයි.
  වැරදි කරන අයට වැරදි කිරීමට පහසුවන අන්දමින් කටයුතු කිරීම.

• අශ්වයාට අං ආවා වගෙයි.
  ආඩම්බර අයට තවත් ආඩම්බර වීමට කරුණු යෙදීම.
  
  
• ඇවිලෙන ගින්නට පිදුරු දානවා වගෙයි.
  අවුලක් ලිහීම වෙනුවට එම අවුල උග්‍ර කිරීමට පියවර ගැනීම.
  
  
• ඇඟෙන් ඇටයක් ගියා වගෙයි.
  තමන් සතු දෙයක් දැඩි අකැමැත්තෙන් අනුනට දීම.
  
  
• ආප්ප පනමට ඉඩම දුන්නා වගෙයි.
  විශාල අලාභයක් සිදුවන ලෙස අනුවණ ගනුදෙනුවක නිරතවීම.
  
  
• ආචාරියා රවටා කැත්ත හැදුවා වගෙයි.
  අනුන් රවටා වැඩ ගැනීමට ගොස් තමන්ම රැවටීමට ලක්වීම.
  
  
• අතු කඩා මොර කන්නා සේ.
  යමකට හෝ යමෙකුට අවාසියක් වන ලෙස තම අවශ්‍යතාව ඉටුකර ගැනීම.

•  ඉඟුරු දී මිරිස් ගත්තා වගෙයි.
  කරදරයකින් තවත් කරදරයකට වැටීම. /කරදරයකින් සහනයක් ලබා ගන්ට සිතා ඊටත් වඩා කරදරයක් ඇති කර ගැනීම.

• ඉබ්බන්ගෙන් පිහාටු ඉල්ලනවා වගෙයි.
  ඉටුකර ගත නොහැකි කාර්යයක් සඳහා උත්සාහ දැරීම. (මසුරු පුද්ගලයකුගෙන් උදව්වක් /යම් දෙයක් ඉල්ලීම.)
  
  
• ඉසේ ඇම්මට කොට්ටේ මාරු කළා වගෙයි.
  යම් ගැටලුවක් විසදීමට ඊට නුසුදුසු පිළියමක් යෙදීම.
  
  
• ඉබ්බා දියේ දැම්මා වගෙයි.
  තමාගේ ආශාව පරිදි කටයුතු කිරීමට හදිසියේ අවස්ථාව ලැබීම.
  
  
• ඉස්සර ආ කනට වඩා පස්සෙ ආ අඟ ලොකුවුණා වගෙයි.
  පළමුව සිටි හිතවතුන් ඈත්කර පසුව හිතවත් වූ අය ඇසුරු කිරීම.
  
  
• ඉබ්බා අහසින් ගියා වගෙයි.
  තමන්ට නොගැළපෙන දෙයක් කිරීමට ගොස් විපතට පත්වීම.

 

• අශ්වයා පැන ගියාට පසු ඉස්තාලය වැහුවා වගෙයි.
  විපත සිදුවූ පසු ආරක්ෂාව තර කිරීම. / ආරක්ෂා කළ යුතු වටිනා දේ නැති වූ පසුව ආරක්ෂාව පිළිබඳ උනන්දු වීම.

• අලියා ගිල්ල දිවුල වගෙයි.
  පිටතින් හොඳ බව පෙනුණත් ඇතුළත හිස්ය.
  
  
• අලි යන කපොලු තිබියදී කූඹි යන හිල් වහනවා වගෙයි. / අලි යන කපොලු තිබියදී කූඹි යන තව් වහනවා වගෙයි.
  විශාල වැරදි තිබියදී සුළු වැරදි වැසීමට උත්සාහ කිරීම. / වැරදි කරන ලොකු පුද්ගලයන් සිටියදී සුළු වැරදි කරන පුද්ගලයන් ගැන කතා කිරීම.
  
  

• අහසේ තරු ගණිනවා වගෙයි.
  කළ නොහැකි දෙයක් කිරීමට වෙර දැරීම.
  
  
  
• අඟේ ඉඳන් කන කනවා වගෙයි.
  පසුව ආ දෙය අගේ කොට මුලින් ආ දෙයට හානි කිරීම. / ඉතාම විශ්වාසවන්ත ලෙස ළඟින්ම සිට හතුරුකම් කිරීම. / කෙනෙකුගෙන් උදවු ලබමින් ඔහුට විපත් සිදුකිරීම.

• අකලට පල ගත් ගෙඩිය වගේ 

         යමක් නොකල්හි හෝ දුර්ලභ අවස්ථාවක හෝ සිදුවීම අරබයා යෙදෙන කියමනකි.

• අග පැලිච්ච බටලීය වගේ

         අග පැලුණු බටලීයෙන් නැගෙන්නේ අමිහිරි ශබ්දයකි. පමණට වඩා දොඩවන්නකු                         හෝ වාචාලකම ඇත්තකු හෝ හැදින්වීමට යෙදේ.

• අඟේ ඉදන් කන කනවා වගෙයි

        පසුව ආ දෙය අගේ කොට මුලින් ආ දෙයට හානි කිරීම අඟවන්නකි.

• අඟුලේ රඟ දැනෙන්නේ පැද්ද කල්හී ගඟේයා 

        යමක් පිළිබඳ නිසි අවබෝධය ලබා ගත හැක්කේ එය ක්‍රියාත්මක කිරීමෙනි.

• අටුව කඩලා පුටුව හැදුවා වගෙයි 

         එක් වැදගත් දෙයක් තනා ගැනීමට තවත් එවැනිම වටිනා දෙයක් නැති         කර ගැනීම.

• අට්ටික්කා ගහේ මල් පිපුණා වගෙයි 

         සිදුවිය නොහැකි දෙයක් ගැන කියවෙන්නෙකි.

• අඬුව තියෙද්දී අත පුච්චා ගත්තා වගෙයි

        යමක් කිරීමට නිසි මඟක් තියෙද්දී අනවශ්‍ය ලෙස ක්‍රියා කොට විපත් පමුණුවා ගැනීම                         අඟවන්නකි.